Euver de StuTS

De Studentische Tagung Sprachwissenschaft (StuTS, in ‘t Limburgs ‘Sjtudenteconferentie Taalkunde’) is veurnamelik ‘ne Duitstalige conferentie en deent es platform veur ‘t oetwissele van weitensjappelikke kènnis ónger sjtudente taalkunde (en gerelateerde vakgebeeje). De conferentie waert meistal in ‘t Duits of Ingels gehaaje. Drie daag lang kriege deilnimmers de kans um sjtudente oet dezelfde vakgebeeje oet de ganse wereld te liere kènne.

Auch kènne deilnimmers ‘ne eige presentatie haaje en de presentaties van angere deilnimmers biejwoeëne. Baovendeen ken idderein interessante en nuttige gesjprèkke mèt mekaar höbbe. Op dees manier kriege sjtudente de kans um häör eige óngerzeuk of paper te presentere in ‘ne relaxte en positieve umgaeving. Inkele docente vanne gastuniversiteit en aanverwante insjtitute zölle keynotes gaeve um zo kórt häör eige óngerzeuk te introducere. Es lètste is d’r auch ‘n sociaal element inne conferentie: sjtudente kriege de kans um de sjtad te verkènne, nieje vrunj te liere kènne, en aaje vrunj weer truuk te zeen.

Traditiegetroew óntvangt de StuTS auch de BuFaTa Linguistics (Bundesfachschaftentagung Sprachwissenschaft), waobiej alle sjtudente auch aanwezig kènne zien.