Gino Morillo Morales – Algemein Secretaris en Vertaler

¡”Buenos días” en “Goeiedaag”!

Zo wies se waarsjienlijk kens zeen höb ich genne ‘typisch’ Nederlandse naam: ich bin van Sjpaanse aafkoms. Ich kóm vanne Ruiver, biej de grens met Pruuses, onneet wied van Belsj aaf, in Limburg, wao veur auch Limburgs kalle. Haopelijk haet dees opeinsjtapeling van tale, lenj en regio’s dich ’n bietje verward: ’t is namelijk precies waodoor ich geïnteresseerd bin gerak in taalvariatie, sociolinguïstiek, angere culture en identiteit. Ich höb ‘ne bachelor in Sjpaanse Taal en Cultuur gedaon en noe bin ich miene Research Master ‘Language and Communication’ aan ’t aafronje. Verder verrich ich auch ethnografisch veldwerk nao “’t Gebroek van ’t Limburgs op peutersjpeelzale in Eèsjde-Mergraote’, veur ’t Meertens Instituut.

Tale liere is ein van mien passies: sjpraek mich gerös in ’t Duits, Frans, Ingels, Italiaans, Limburgs, Nederlands, Portugees (aan ’t liere!) of Sjpaans aan. In miene vrieje tied doon ich gaer reize (oeits krieg ich dae wereldkraskaart baove mien bed gans aaf!), zjwum ich gaer en pik ich gaer ’n terrasje met vrunj. Flauwe woordgrappe zien auch altied welkom. Ich bin auch fan van Real Madrid, ’t Sjpaanse nationale elftal en Fernando Alonso. Ich heit uch gaer welkom in Nimwaege en ich bin altied in veur ’n sjoeën gesjprek!